Փետրվարի 11-ին Առաջատար տեխնոլոգիաների ձեռնարկությունների միության (ԱՏՁՄ/UATE) 25-րդ հոբելյանական Համաժողովի ընթացքում կայացած նախագահի ընտրություններին միության նոր նախագահ ընտրվեց Արմեն Քոչարյանը՝ VOLO և Spark Work ընկերությունների, տեխնոլոգիական բազմաթիվ այլ նախաձեռնությունների հիմնադիր և ղեկավար։
Ավելի վաղ արդեն նախկին նախագահ Ալեքսանդր Եսայանը հայտարարություն էր տարածել, որում առաջադրել էր Քոչարյանի թեկնածությունը։ «Արմենն ԱՏՁՄ-ում է շուրջ 2 տասնամյակ, և ամենայն հարգանքով բոլոր գործընկերներիս հանդեպ, քիչ մարդ եմ ճանաչում, ում անձնական ներդրումը մեր կառույցի և առհասարակ էկոհամակարգի զարգացման գործում համադրելի է Արմենի ներդրման հետ։ ԱՏՁՄ 25-րդ հոբելյանական Համաժողովի ընթացքում կայանալիք նախագահի ընտրություններին ձայնս տալու եմ Արմեն Քոչարյանին և բոլոր պատվիրակներին հորդորում եմ վարվել նույն կերպ։ Արմենը գերազանց նախագահ է լինելու»,-նշել էր նա իր հայտարարության տեքստում։
Առաջատար տեխնոլոգիաների ձեռնարկությունների միությունը Հայաստանի տեխնոլոգիական ընկերությունների ասոցիացիան է՝ երկրի խոշորագույն «հայթեք» միավորումը և Հայաստանի հհնագույն և խոշորագույն բիզնես ասոցիացիաներից մեկը։ Հայաստանի 1000 խոշոր հարկատուների ցանկում ընդգրկված ՏՀՏ ընկերությունների կողմից վճարվող հարկերի շուրջ 70%-ը վճարում են UATE-ին անդամակցող ընկերությունները։ Տեխնոլոգիական համայնքից դուրս UATE-ն լայնորեն հայտնի է որպես DigiTec-ի՝ Հայաստանի և տարածաշրջանի խոշորագույն ամենամյա տեխնոլոգիական իրադարձության (ցուցահանդես, համաժողով, փառատոն) կազմակերպիչ, ինչպես նաև «Արմաթ»-ի՝ ճարտարագիտական կրթության (Armath Engineering Makerspaces) հայկական ազգային ծրագրի օպերատոր։
Առաջատար տեխնոլոգիաների ձեռնարկությունների միություն