Քաղաքաշինական գործունեության ոլորտում իրականացված վերահսկողության արդյունքում ապօրինի շինությունների կառուցման եւ հողազավթումների դեպքերով կազմվել է 81 արձանագրություն, հողօգտագործման ոլորտում խախտումների համար՝ 29 արձանագրություն: Շինհրապարակների համար սահմանված պայմանների չպահպանման համար կազմված արձանագրությունների թիվը 127 է: Այս մասին Երեւանի քաղաքապետարանի գործակարգավարական խորհրդակցության ժամանակ զեկուցեցին քաղաքապետ Տիգրան Ավինյանին:
«Շինհրապարակների պատշաճ կահավորման արձանագրություններով պայմանավորված՝ հաջորդ տարի դիտարկելու ենք հնարավոր տարատեսակ արտոնություններ»,-ասաց Տիգրան Ավինյանը: Նա նաեւ դիմեց կառուցապատողներին՝ նշելով, որ շինհրապարակները պատշաճ կերպով չկահավորելու դեպքում չեն ունենա արտոնություններ. «Դա էական ազդեցություն է ունենալու կառուցապատողների տուրքերի վրա եւ համապատասխան վերաբերմունք է ցուցաբերվելու իրենց հանդեպ ավագանու կողմից… Հարգելի կառուցապատողներ, հաշվի առեք, որ ձեր չտեղադրված փոշու կլանիչ ցանցերը, չտեղադրված օդի որակի չափիչ սարքերը եւ ոչ պատշաճ կահավորումը ֆինանսապես էականորեն ազդելու է ձեզ վրա»: