Զարուհի Փոստանջյանը, որ երեկ ուշ երեկոյան ահազանգել էր, որ իրեն չեն թույլատրում մտնել ԱԱԾ-ի մեկուսարան ու տեսակցել իր պաշտպանյալ Վարդան Ղուկասյանին, առավոտյան հանդիպել է նրան։ Նա մանրամասներ է ներկայացրել Գյումրու քաղաքապետի առողջական վիճակի մասին։ Փաստաբանը մասնավորապես նշել է.
«Վարդան Ղուկասյանը գիշերը մի կերպ է լուսացրել, այս պահի դրությամբ ունի բարձր շաքար, նա անձամբ է ստուգում ու վերահսկում այդ շաքարի պարունակությունը արյան մեջ։ Գանգատները հիմնականում գլխապտույտի, տեսողության ու ականջներում խշշոցի հետ է կապված, ունի թուլություն, սրտխառնոց։ Գիշերը գրեթե չի քնել, այս պահի դրությամբ նրան որևէ բժիշկ չի այցելել՝ չնայած նրան, որ դա անհրաժեշտ է և պարտադիր է։ Խցային պայմանները շարունակում են մնալ նույնը, այն խուցն է, որտեղ չկա օդափոխություն, չկան պայմաններ, այդ նույն խցում են նրան պահում»։
Փաստաբանն ահազանգում է, որ խցային պայմաններով ու առողջական վիճակի վատթարացման պայմաններում դիտավորյալ այսպես անում, որ ինչպես այլ կալանավորների դեպքում ենք տեսնում՝ կալանավորները պատշաճ բուժօգնություն չեն ստանում և մահանում են։ Զարուհի Փոստանջյանը նաև նշեց, որ շարունակելու է բողոքներ ներկայացնել, որպեսզի Գյումրու քաղաքապետին տեղափոխեն հիվանդանոց։