Միացյալ Նահանգների նախագահ Դոնալդ Թրամփը կոչ է արել բոլոր ավիաընկերություններին Վենեսուելայի վրայով և շրջակայքով օդային տարածքը համարել փակված։ «Արմենպրես»-ի հաղորդմամբ՝ այս մասին ԱՄՆ նախագահը նշել է «Truth Social» սոցիալական կայքի իր միկրոբլոգում։
«Բոլոր ավիաընկերություններին, օդաչուներին, թմրանյութերի և մարդկանց առևտրով զբաղվողներին. խնդրում եմ Վենեսուելայի վրայով և շրջակայքով օդային տարածքը համարել լիովին փակված»,-գրել է նա։
Օրեր առաջ Reuters-ը, հղում անելով ԱՄՆ պաշտոնյաներին, հաղորդել էր, որ ԱՄՆ-ն պատրաստվում է առաջիկա օրերին սկսել Վենեսուելայի դեմ գործողությունների նոր փուլ, այդ թվում՝ նախագահ Նիկոլաս Մադուրոյի հնարավոր տապալումը։ Վերջին երկու ամիսների ընթացքում ԱՄՆ-ն բազմիցս օգտագործել է ռազմական ուժեր՝ Կարիբյան ծովում ենթադրաբար թմրանյութեր տեղափոխող նավակներ ոչնչացնելու համար։ Իշխանությունները պնդում են, որ նման գործողություններ են իրականացվում միջազգային հանցագործության և թմրանյութերի ապօրինի շրջանառության դեմ պայքարի համար։ Սա զգալիորեն սրել է Կարակասի և Վաշինգտոնի միջև հարաբերությունները: Սպիտակ տունը լիազորել է ԿՀՎ-ին գաղտնի գործողություններ իրականացնել հանրապետությունում՝ Մադուրոյի կառավարությունն անկայունացնելու համար: Իսկ ԱՄՆ գլխավոր դատախազ Փեմ Բոնդին հայտարարել է 50 միլիոն դոլարի պարգևատրման մասին՝ նրա ձերբակալությանը հանգեցնող տեղեկատվության համար: Ենթադրվում է, որ Վենեսուելայի նախագահն օգտագործում է ահաբեկչական կազմակերպություններ՝ Միացյալ Նահանգներ թմրանյութեր մաքսանենգ ճանապարհով տեղափոխելու համար: