Հայաստանում վերջին օրերին կամավոր ատեստավորմանը մասնակցած 7200 ուսուցիչների շուրջ 67.2 տոկոսը հաղթահարել է ատեստավորումը:
«Արմենպրես»-ի փոխանցմամբ՝ այս մասին ասաց ԿԳՄՍ նախարար Ժաննա Անդրեասյանն ԱԺ-կառավարություն հարցուպատասխանին: Ըստ նախարարի՝ այս տարի կամավոր ատեստավորման թե դիմելիությունը, թե մասնակցությունը ցույց են տալիս, որ համակարգն իսկապես դարձել է ուսուցիչների համար վստահելի և իրենց վարձատրության ու մասնագիտական զարգացման կարևորագույն օղակ: Այս տարի մասնակցության համար դիմել են 8400-ից ավելի ուսուցիչներ: Նրանցից ավելի քան 7200-ը մասնակցել են կամավոր ատեստավորմանը:
«Այս պահի դրությամբ, առանց հաշվի առնելու վերջին բողոքարկումների արդյունքները, մասնակցած ուսուցիչների շուրջ 67.2 տոկոսը հաղթահարել է կամավոր ատեստավորումը: Դա նշանակում է, որ ավելի քան 4800 ուսուցիչ այս պահի դրությամբ վարձատրության բարձրացման այս հնարավորությունն օգտագործել են: Ընդ որում, այս ուսուցիչների մեծ մասն առաջին անգամ մասնակցող ուսուցիչներ են: Հիշելով, որ արդեն իսկ կամավոր ատեստավորված էր ուսուցիչների շուրջ 20 տոկոսը, սա նշանակում է, որ մենք էապես ընդլայնում ենք կամավոր ատեստավորված ուսուցիչների շրջանակը»,-ասաց Անդրեասյանը: