SHAMSHYAN.com-ի տեղեկություններով՝ նոյեմբերի 25-ին, գողության դեպք է տեղի ունեցել Կոտայքի մարզում։ Ժամը 16։10-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Կոտայքի բաժին է դիմել Կոտայքի մարզի բնակիչ 36-ամյա Նարե Վ․-ն և հայտնել, որ 2023 թվականի դեկտեմբերի 1-ին տեղի ունեցած ավտովթարից հետո իրեն պատկանող «Hyundai Getz» մակնիշի ավտոմեքենան տեղափոխել են ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնի հարակից տարածք, որտեղ ավտոմեքենայից գողություն է կատարվել։
Ինչպես հայտնում է ֆոտոլրագրող Գագիկ Շամշյանը, Նարե Վ․-ն հայտնել է, որ նոյեմբերի 14-ից մինչև նոյեմբերի 20-ն ընկած ժամանակահատվածում անհայտ անձը գողացել է նշված ավտոմեքենայի թվով 4 անվադողերը իրենց անվահեծերով և մեկ պահեստային անվադողը՝ իր անվահեծով, նաև անհայտ ժամանակահատվածում նվագարկիչը և լուսարձակը՝ իրեն պատճառելով 2 հարյուր հազար դրամի նյութական վնաս։ Դեպքի փաստով ոստիկանության Կոտայքի բաժնում փաստաթղթեր են կազմվել, որոնք փոխանցվել են ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժին։