Ինչ-որ պահի Հայաստանը ստիպված կլինի ընտրություն կատարել Եվրոպական Միության և Եվրասիական տնտեսական միության (ԵԱՏՄ) միջև։ Անհնար է միաժամանակ մնալ երկու միավորումներում, լրագրողներին հայտարարել է ՌԴ փոխվարչապետ Ալեքսեյ Օվերչուկը և հայտնել Հայաստանի նկատմամբ ռուսաստանյան բիզնեսի վերաբերմունքի փոփոխության մասին, հաղորդում է «Интерфакс»-ը։
«Ինչ վերաբերում է Եվրոպական Միության հետ Հայաստանի մերձեցմանը, մենք բազմիցս խոսել ենք դրա մասին։ Կարծում ենք, որ միաժամանակ երկու ինտեգրացիոն միավորումներին անդամակցելն անհամատեղելի է։ Ինչ-որ պահի Հայաստանի ժողովուրդը ստիպված կլինի ընտրություն կատարել»,- ասել է նա։Նրա գնահատմամբ՝ ընդհանուր առմամբ Հայաստանը և Ռուսաստանը պահպանում են լավ կապերը, սակայն երկրների միջև առևտուրը զգալիորեն նվազել է 2025 թվականին։
«Մենք այս տարի տեսել ենք Հայաստանի հետ տնտեսական առևտրի անկում, եթե խոսքը Ռուսաստանի և Հայաստանի միջև փոխադարձ առևտրի մասին է։ Անցյալ տարի, ինչպես հիշում եք, մեր երկրների միջև առևտրաշրջանառությունը կազմել է 12,4 միլիարդ դոլար։ Այս տարի այն, հավանաբար, կկազմի մոտ 6 միլիարդ դոլար։ Սա շատ նկատելի անկում է»,- ընդգծել է ՌԴ փոխվարչապետը։