Երեւանի քաղաքապետարանի գործակարգավարական խորհրդակցության ժամանակ անդրադարձ եղավ Նուբարաշենի այսօր գործող աղբատեղիին կից աղբի վերամշակման գործարանի կառուցման մրցույթին: Նշվեց, որ ներդրողի կողմից պահանջվելու է աշխարհում ընդունված՝ աղբի վերամշակման տարբերակներից որևէ մեկով ներկայացնել առաջարկ, այն է՝ կառուցել գործարան, ընդունել համայնքի կողմից ստացվող աղբը, տեսակավորել և բնապահպանական նորմերին համապատասխան ոչնչացնել:
«Ի՞նչ սկզբունքով է գնահատվելու առաջարկը»,-հետաքրքրվեց քաղաքապետ Տիգրան Ավինյանը: Նրան պատասխանեցին, որ մի քանի սկզբունք է կարևորվելու. առաջարկ ներկայացնողը պետք է ունենանա նախկինում իրականացված նման փորձառություն, պետք է համապատասխանի ԻՍՕ ստանդարտներին, հետևի բնապահպանական նորմերին և այլն: Կարևորվելու է նաև տեղական աշխատուժի ներգրավումը: