«Մեր կարծիքով՝ առերևույթ հանցակազմ կա, այդ դեպքով իրավապահները պիտի քննեն։ Հակակոռուպցիոն կոմիտեն արդեն ասել է, որ ուսումնասիրում են»,-Oragir.News-ի հետ զրույցում ասաց «Անկախ դիտորդ» հասարակական դաշինքի համակարգող Դանիել Իոաննիսյանը։ Հիշեցնենք՝ Երևանի քաղաքապետ, իշխող ՔՊԿ նախընտրական ցուցակի պատգամավորի թեկնածու Տիգրան Ավինյանը նախընտրական շրջանում երիտասարդ աղջկան ֆոտոխցիկ է նվիրել։ Նշենք, որ ՀՀ Քրեական օրենսգրքի հոդված 221-ի համաձայն ընտրական շրջանում բարեգործություն իրականացնելն արգելվում է։ Նշենք նաև, որ ավելի վաղ լրատվամիջղներից մեկի հետ զրույցում Ավինյանը նշել էր, որ խոսքը մանկատան սանի մասին է, որին այցելել է մեկ ու կես տարի առաջ, համապատասխան ֆինանսավորում էին փոխանցել մանկատանը, որ տեսախցիկը գնվեր, բայց չէր գնվել։ Այս ամենի համատեքստում հետաքրքրական է այն, որ վերջերս իրավապահները քրեական վարույթ հարուցեցին Սամվել Կարապետյանի ղեկավարած «Ուժեղ Հայաստան» կուսակցության թեկնածու Գոհար Ղումաշյանի դեմ՝ հեռուստացույց նվիրելու փաստով։ Նրան Հակակոռուպցիոն կոմիտեն մեղադրանք էր առաջադրել բարեգործության արգելքը խախտելու համար։
Ավինյանի արարքում հանցակազմ կա. իրավապահները պիտի քննեն այն. Իոաննիսյան․Oragir.News
