Լատվիայի վարչապետ Էվիկա Սիլինյան հայտարարել է, որ ինքը և իր ողջ կառավարությունը հրաժարական են տալիս։ Tert.am-ի փոխանցմամբ, այս մասին հայտնում է Սպուտնիկ Լատվիա գործակալությունը։ «Հայտնում եմ 2026 թվականի մայիսի 14-ին վարչապետի պաշտոնից իմ հեռացման և ողջ նախարարների կաբինետի հրաժարականի մասին»,- ասված է Սիլինյայի հայտարարության մեջ: Նշվում է, որ մայիսի 14-ին Սեյմում ընդդիմության նախաձեռնությամբ կարող էր տեղի ունենալ վարչապետին անվստահություն հայտնելու քվեարկություն։ Սիլինյան հայտարարել է իր հրաժարականի մասին՝ չսպասելով քվեարկությանը։ Սա նշանակում է նաև ողջ կառավարության հրաժարական։
Մայիսի 10-ին հաղորդվել էր, որ Լատվիայի պաշտպանության նախարար Անդրիս Սպրուդսը հրաժարականի դիմում է ներկայացրել լատվիական Ռեզեկնե քաղաքում նավթամբարի վրա անօդաչու թռչող սարքի ընկնելու միջադեպից հետո։ Պաշտպանական գերատեսչության նախնական տվյալների համաձայն՝ անօդաչուն ուկրաինական էր։ Մայիսի 7-ի առավոտյան Լատվիայի օդային տարածք են ներթափանցել մի քանի ԱԹՍ-ներ, որոնցից մեկն ընկել է Ռեզեկնե քաղաքում՝ վնասելով նավթամթերքի պահեստարանը։ Միջադեպը մեծ արձագանք է առաջացրել Լատվիայում, ընդդիմադիր կուսակցությունները պահանջել են պաշտպանական գերատեսչության ղեկավարի հրաժարականը։ Արդյունքում Սպրուդսը հայտարարել է, որ պատրաստ է հեռանալ պաշտոնից և պատասխանատվություն ստանձնել այն բանի համար, որ այդ օրը Լատվիայի օդային տարածք ներթափանցած անօդաչուները անվտանգ կերպով չեն խոցվել, ինչը հանգեցրել է նավթաբազայի վնասմանը։