Սիրիական բանակը հայտնել է, որ իր ուժերը նահանջել են Համա քաղաքից, որտեղ թեժ մարտեր են ընթանում ահաբեկիչների հետ։
«Վերջին մի քանի օրերի ընթացքում մեր զինված ուժերը կատաղի մարտեր են մղել՝ հետ մղելու և կասեցնելու ահաբեկչական կազմակերպությունների կողմից իրականացվող հարձակումները Համա քաղաքի վրա տարբեր կողմերից, որոնք օգտագործում են բոլոր միջոցներն ու ռազմական տեխնիկան, ինչպես նաև դիվերսիոն խմբեր։ Վերջին ժամերին մեր զինվորների և ահաբեկչական խմբավորումների միջև բախումների սրման և մեր զորքերի շրջանում մեծ թվով զոհերի պատճառով այս խմբերը կարողացան ճեղքել քաղաքի մի քանի ուղղություններ և մուտք գործել այնտեղ՝ չնայած մեծ կորուստներին։
Համայի խաղաղ բնակիչների կյանքը պահպանելու և քաղաքների ներսում մարտերին չներքաշելու համար այնտեղ տեղակայված զորամասերը վերաբաշխվել են քաղաքից դուրս: Ցամաքային զորքերի և զինված ուժերի գլխավոր հրամանատարությունը հայտարարում է, որ կշարունակի կատարել իր ազգային պարտքը՝ վերադարձնել ահաբեկչական կազմակերպությունների կողմից ներխուժած տարածքները»,- ասվում է սիրիական բանակի հայտարարության մեջ։
Խմբավորումները, որոնցից ամենաուժեղը թուրքամետ «Հայաթ Թահրիր ալ-Շամ»-ն է, սկսել են իրենց հարձակումը նոյեմբերի 27-ին։ Մի քանի օր անց՝ նոյեմբերի 30-ին, ահաբեկիչները գրավել են Հալեպի նահանգի մայրաքաղաք Հալեպ քաղաքը։